مردمی اَرزی ئے پہ زاهدان ءُ درُستیں سیستان ءُ بلوچستان ءَ ورگی آپ‌، پہ اِشتاپی ءَ برجمی بہ بیت

۲۲ تیر ۱۴۰۵

پہ:

جمهوری اسلامی ایران ءِ رئیس، نیروئے وزیر، برنامه ءُ بودجه ءِ گل‌ ءِ رئیس، سیستان ءُ بلوچستان ءِ استاندار، مُلکے آپ ءُ گنداپ ءِ انجنیری کمپنی ءِ مدیرعامل، سیستان ءُ بلوچستان ءِ آپ ءُ گنداپ ءِ کمپنی ءِ مدیرعامل، استان ءِ مجلس ءِ نمائندگان، ءُ انرژی‌ئے کمیشن، آبادانی ءُ اصل نود ءِ کمیشن‌ا‌‌ن

ما، اے اَرزی ءِ دزنام جنوکان، زاهدان ءُ ائے دگے شھر ءُ سیستان ءُ بلوچستان ءِ هلگ‌ان، چہ زابل، زهک، خاش، سراوان، ایرانشهر، راسک، دشتیاری، چهبار ءُ کنارک ءَ، وتی زهرشانی ءَ پہ مدام‌ایں بی آپی ءَ کہ گیش ءَ گیش‌ایں مردمانی سرا کپتگ، پیش کن‌ایں۔

سیستان ءُ بلوچستان ءِ آپ ءِ کزا دگہ یک موسمی کمی یا یک ءُ دو روچی بد روچی‌ئے نہ اِنت۔ ائے کزا، بیهئوری ءُ سَکّ‌ایں گرمی ئے ھواری، سر بُرے ءُ زمین چیرے آپے کم بئگ، شمالے مردمانی مھتاجی پہ ھیرمند ءُ چات‌اں، آپانی سور بئگ، نپرانی گئیش بئگ ابید چہ بنیادی بُنپد ءُ سامان، آپ رسانی ئے سامانانی ھرابی، آپے زوال بئگ، آپ رسینگے پروجکت‌انی دیم نہ‌روگ‌ سبب ءَ انت۔

پمیشکا استان ءِ درُستیں آپ ءِ جیڑهاں هوشک‌سالی یا هیرمند ءِ حک‌آپ ءِ نرسگ ءِ نام ءَ جَنگ راست‌ایں پسوے نہ اِنت۔ زاهدان ءِ جیڑه گوں دشتیاری ءِ ھَلک‌ان یا تیاب دپے شھران ھنچو چهبار ءُ کنارک ءِ جیڑه یک نہ اِنت۔ هرچ دمگ ءَ وتی مردمانی شمار، وتی

اُٹّ و ٹۆر ءُ ھست ءُ نیست‌ے ھساب ءَ جتا جتایں پئیسلہ لوٹ‌ایت۔

زاهدان وت آپ ءِ کمّی ءَ دیم پہ دیم اِنت

سیستان ءُ بلوچستان ءِ آپ ءُ گنداپ ءِ کمپنی ءِ آپ ءِ دیمروی ءِ معاون ءِ گُشگ ءِ رِد ءَ، خرداد ۱۴۰۵ ءَ زاهدان ءِ آپ ءِ لوٹ، گیشیں کارمرز ءِ وھد ءَ، هر ثانیه ءَ سه هزار لیتر ءَ چہ گیش اَت؛ بلے شهر ءِ عملی آپ فراھم کنگ ءِ توان کم و گیش دو هزار لیتر هر ثانیه اَت۔ بزاں استان ءِ مرکز ءَ گیشیں کارمرز ءِ وھد ءَ کم و گیش هر ثانیه هزار لیتر آپ ءِ کمّی هست‌۔ اے کمّی اسلی سبب انت کہ آپ‌ نزور انت ءُ ھر دمان ءَ بند بیت انت۔

نوک جوڑ بوتگیں دمگاں ءُ ملی مسکن ءِ مجتمعانی تہ ءَ، لوگ ءِ جوڑ کنگ ءُ مردمانی گیش بوھگ گوں آپ ءِ شبکه ءِ هم‌اندازه دیمروی ءَ نہ بوتگ۔ خرداد ۱۴۰۵ ءِ میدانی ھالکاری‌ان درشان کتگ کہ لھتے لوگان‌ مان هپتگ ءَ گیش ءَ گیش چار روچ آپ رسیت، آ ھم نیم‌شپ یا بانگواہ ءَ بس چنٌت ساعت۔ لھتے میتگانی تہ ءَ آپ ءِ زور انچو کم اِنت کہ لوگانی پمپ هم آپ ءَ مخزنانی تہ ءَ سر کنگ نہ کنت۔

اے جاور وھدی کہ گرمی  40 درجہ ءَ چہ گیش انت، ھاس پہ چُکان، کماشان، بیماراں، آھان کہ مھلولیت ھست ءُ آ کہ سردی واست ءَ آپی کولرے مھتاج انت، بس یک بدروچی ئے ںہ انت، چوناھیگا آھانی دراہ‌ی ھترے تہ انت۔

استیں آپ ءِ مزنیں بهرے مردم ءَ رسگ ءَ پیسر زئوال بیت انت

بس آپ ءِ سرچمگانی کمی کزا ءِ سئوب نہ اِنت۔ استان ءِ آپ ءُ گنداپ ءِ کمپنی ءِ رِد ءَ، لھتیں شهری شبکهانی تہ ءَ آپ ءِ زئوال سی درصد ءَ چہ گیش ءُ لھتیں روستایی شبکهانی تہ ءَ چهل درصد ءَ چہ گیش اِنت۔ انچیں استانے ءَ کہ آپ ءِ سختیں کمی هست، اے کساس ءَ آپ ءِ زئوال بوھگ درشان کنت کہ وئیران ءُ کهنیں شبکهانی بازسازی ءَ باید نوکیں آپ ءِ سرچمگانی جوڑ کنگ ءِ هم‌ترازی ءَ ارزشت دئیگ بہ بیت۔

چاتے کوچگ، آب‌شیرین‌کن ءِ جوڑ کنگ یا آپ ءِ کارگ، ابید چہ

هست‌ایں ءُ آپے ھرابیں سامانانی جوڑ کنگ ءَ، ٹانکی جوڑ کنگ ءُ آپے زورا گیش کناگ ءَ، زلور آپ پہ مردمانی لوگ ءَ نہ بارت۔ بیت کنت کہ یک شھرے یا دمکے نامے سرا آپے شبکہ ءَ ھوار انت بلے چوناھیگا بس یک ءُ دو ساعت آپی بہ بیت۔

سد سد دمکان انگت‌‌ ءَ  یک پورگ‌ایں شپ ءُ روچے ءَ آپ‌اش نیست

وزارت نیرو ءَ مان سال ۱۴۰۳ ءَ جاذ کت که استان ءِ ۲۳۵۱ میتگ گوں آپ ءِ کمّی یا سُستی ءَ دیم په دیم بوتگ‌انت ءُ «جهاد آبرسانی» ءِ طرح ءِ تہا، ۱۷۵۱ میتگ ءَ که کم ءُ گیش ۵۵۴ هزار نپر انت، آپ رسینگ کارپد (دستور کار) ءِ تہا ایر کنگ بوتگ. همآ وهد ءَ گوشگ بوت که ۴۰۱ میتگ گوں نزیک په ۱۴۸ هزار نپر ءَ، چہ پایداریں آپ ءَ بهرمند بوتگ‌انت.

 اے داب‌ایں طرح  باز اھم دار انت ءُ آھانی برجم دارگ باید انت برجاه بمان‌ایت، بلے نوکیں ھال پیش کن‌انت که کزا انگت باز مزن ءُ تالان انت. ۱۹ خرداد ۱۴۰۵ ءَ، چابهار ءِ گچینکاری دمگ ءِ نماینده ءَ اعلام کت که اے ھلک ءِ ۷۰۰ ءَ چہ گیشتریں میتگ انگت چہ شبانه‌روزی ءُ پایداریں ورگی آپ  ءَ محروم انت ءُ اے مشکل ءِ گیش‌اینگے واست ءَ، آپ رسینی لکّانی (خطوط انتقال) سرجم کنگ، آپ رسینی فرنٹانی (مجتمع‌های آبرسانی) جوڑ کنگ، آپ ءِ ٹانکی ءِ گنجائش ءِ گیش کنگ ءُ آپ‌شیرین‌کنانی دیمروی ءَ ضرورت انت.

اعلام بوتگیں پروژهانی شمار ءُ هما ھلک‌انی شمار که انگت ءَ بی آپ انت، مزنیں کمّی هست۔ اے درشان کنت که بس پروژه ءِ بندات، لولہ ءِ ایر کنگ یا یک ھلک ءِ نام ءَ مان پرجکت ءَ ھوار کنگ، نبایدیں آپ ءِ کزا ئے گار بئگ زانگ بہ بیت۔  

سوبین بوھگ ءِ معیار باید هما آپ ءِ اندازگ، کیفیت ءُ مدامی بہ بیت که اسلا مردم ءِ لوگاں رسیت۔

سرکاری آمار سالانی سرا یکان دگرا یک نہ انت۔ ۱۳۹۸ ءَ گُشگ بوتگ اَت کہ ۲۷۲۶ بازار ابید چہ آپ رسینوک‌ایں سامان انت ءُ کم ءُ گیش  ۲۵۱ هزار دمکے مردم وتی آپ ءَ چہ ٹانکر ءَ گِر انت۔ بلے مھتاجی پہ ٹانکرا پیش کنت کہ ئے وڈیں وسیلہ کہ بایدیں یک ءُ دو روچی‌ بیت انت، دائمی ترّتگ۔

آپ ءِ کزا گریبانی واست ءَ گرانتر انت

 آپ ءِ بند ءَ نزور بوھگ، اے بُندریں نیاز ءِ‌ زمے ءَ مردمانی سرا دور دات‌انت۔ مردم مجبور اَنت که ٹانکی، پمپ، بوتلی آپ یا بازار ءَ چہ ٹانکرے آپ بزور انت۔ گریب‌ایں کھول مزن‌این ٹانکی، زورمندیں پمپ یا بازارا چہ آپ زورت نکن‌انت ءُ گیش‌ ءَ گیش بی آپ بند یا سلّین آپ دست‌اش کپی‌ت ءُ نادراہ بنت۔

بازی‌ایں ھلک‌اں آپے کارگ ءُ دارگ ءِ زمہ زالبولاں ءُ چوکانی سرا انت۔آپے بند بئگ، مدرسہ، درمانجاہ، کسانین روزگار ءُ کھولی کشت ءُ کشار ءَ بند کنت ءُ مردم مجبور بنت کہ ملک ءَ لٹ‌انت ءُ پہ شھرا رونت۔

لھتے چہ بلوچستان‌ے زِرباریں ھلک‌اں مھتاجی پہ ھوٹک‌اں انگت چوکانی زند ءَ ھترہ تہ کنت ءُ نادراہ کنت۔ یک ھالکاری‌ے فرودین 1405 ءَ پیش کتگ کہ سالے 15 تان 20 چوک مر انت۔ ئے سرکاری ھالکاری‌ے نہ انت بلہ بیرانی‌انی کہ نام دئگ بنت، پیش کنت کہ آپہ کمی بس تُن نیاری، سکّی باز کاری‌ایت۔

آپ ءِ بنیاتاں بایدیں برگے بندی ءُ جنگ ءِ ماھول ءَ مُھر بہ بنت

چهبار ءُ کنارک ءِ درو آپ چہ آپ شیرکن کنوک ءَ کئیت۔ مان سال

۱۴۰۳ ءَ استان ءِ آپ ءُ گنداپ ءِ کمپنی ءَ گُشتگ اَت که شیرکن کنگ ءِ توان چہ ۴۰ هزار مکعب متر ءَ پہ ۴۸ هزار مکعب متر روچانه ءَ گیش کنگ بوتگ، بلے آپ ءِ بھربندی انگت برجاہ اَت۔

نوکیں اُرشانی دَور ءَ چهبار ءُ کنارک ءِ سه برق ءِ انتقال ءِ لئین چہ کار ءَ در اتکگ اَت که رند ءَ دو خط پدا راه کپتگ ات۔ اے چیز درشان کت کہ آب‌شیرکن‌کنوک، چات، پمپاژ ءِ استیشن ءُ بھر کنگے لئین چینچوک پہ برگ ءَ مھتاج انت۔

ما نہ گُش ایں که جنگ ءَ استان ءِ آپ ءِ کزا جوڑ کوتگ۔ ئے کزا سالانی سال انت کہ ھست۔ بلے اگں ھرابی ئے مان برگے کاردام، گازوئیل، بر ءُ آرگ ءُ بدلی ئے سامانی دست‌کپی ءَ بہ بیت، چیزے کہ پیسرا چہ کارا نبیتگ، گندتر بیت‌ایں۔ دولتے سرا انت کہ پہ آپ شیرکن‌کنوکان، چاتاں، پمپ‌انی اسٹیشن‌انی واست ءَ گازوئیل ءُ بدلی سامان دست بہ‌دنت۔

دمگی زھرشانی نباید‌ایں سرگوز کنگ بہ بنت

استان ءِ مردم‌اں گوستگیں سالاں وتی آپ ءِ جیڑه ءَ مان آرامیں زھرشانی‌اں پیش کُتگ۔ مان سال 1402 ءَ زابل ءِ مردم‌اں هیرمند ءِ ھک‌آپ ءِ نرسگ، هامون ءِ هوشک بوھگ، دنز ءُ هاک ءِ توپان، روزیگ ءِ وئیران بوھگ ءُ آپ ءُ برگ ءِ بند بئگ ءِ سرا باز رندق مُچ بوتگ اَنت۔ مرداد ۱۴۰۲ ءِ مُچ بوھگ، پنچوم‌ایں زھرشانی انت کہ مان دو سہ ماہ ءَ برجم بیتگ۔

زھرشانی‌انی دیمروی درشان کنت که جیڑه بس ھدا دادی آپ ءِ کمّی نہ انت، بلے پہ مردمانی بروسہ، ساپی، بن‌رداں ادالت ءِ سرا بھر ءُ بُن کنگ ءُ سرکارانی پسّو دئگے سرا ھم ھست۔

ما مَنّ ایں که دولت گوستگیں سالاں لھتے کار کوتگ، چات کوچگ، بر ءُ آر ءِ لئین جوڑ کنگ، آب‌شیرکن‌کنوکانی دیمروی، ٹانکی جوڑ کنگ ءُ ھلک‌انی تہ پروجکٹ جوڑ کوتگ۔ بلے زاهدان ءِ هر ثانیه کم و گیش هزار لیتر آپ ءِ کمّی، کاردامانی مزنیں آپ زوالی، تیابہ شهرانی بھربندی ءُ سدهاں ھلک‌اں آپ نرسگ، درشان کنت که اے کار کزا ءِ گار کنگے اندازگ ءَ نہ انت۔

مئے واھگ ءُ لوٹ

ما، اے اَرزی ءِ دزنام جنوکاں، جہل آرتگ‌ایں چیزّاں لوٹ کن ایں:

۱. په اِشتاپی زاھدان چارگ بہ بیت

استان ءِ نیروی وزارت ءُ آپ ءُ گنداپ ءِ کمپنی، پروگرمہ شنگ بکن انت ءُ پیش بکن انت کہ چہ پیم ءَ ھزار لیتر کمّی مان یک ثانیہ تہ ءَ پئیسلہ دئگ بیت‌ایں۔ ائے پروگرم بایدیں راستین گنجایش ءَ، ٹایم ٹیبل، چونکا بن‌رِد میان ھلک‌اں ءُ شنگ بنت ءُ چونکا کِر گوری ھلک‌اں رسی۔

۲. آپ ءِ آمار ءِ عام سرا شنگ بہ بنت

آپ ءِ جوڑ بئگ، کارمرز، کمّی، کیفیت، نزوری، بند بئگ، کاردام ءِ زوالی ءُ پروجکٹ‌انی جاور ءِ سرپدی باید هر ماه، ھرچ شهر، ھلک ءُ بازار ءِ جِتا آمارانی سرا شنگ بہ بیت۔ مردم بایدیں زانت بکن انت که هرچ پروجکٹ ءَ چنت زر دئیگ بوتگ، چنت دیمروی کتگ ءُ کجام تاریخ ءَ پہ  کارمرز ءَ تیار بیت انت۔

۳. وئیرانیں کاردام اِشتاپی ءَ جوڑ بہ بنت

نیروی‌ئے وزارت بایدیں سالی پروگرم ءُ نامینتگ‌ایں زرے پہ ھرابیں لئین‌انی بدل کنگ ءَ، آپہ زوالی‌ئے کم‌ کنگ ءَ پیش بہ‌کنت۔

بایدیں پیش بکن انت کہ ھرچ شھر ءُ مُلک‌ے ءَ مراد ھست چینچو آپ‌ے زوالی کم کنگ بہ بیت ءُ آئی‌ئے دیمروی ءَ پیش بکن انت۔

۴. زِبَهریں ھلک‌اں آپرسانی ءِ سرجم بہ بیت

چهبار ءِ حوزه ءِ ۷۰۰ ءَ چہ گیش ھلک ءُ ائے دگے ھلک‌اں کہ آپ‌اش نیست، ودارلڑ جوڑ بہ بیت، ھرچ پروجکٹ ے زر ءُ ٹایم ٹیبل شنگ بہ بنت۔ بس پہ نام آپ‌ے کاردام ءَ ھور بئگ رد انت ءُ بایدیں پروجکٹ سرجم بہ بیت۔

۵. ٹانکراں کانودی رهبند دئگ بہ بنت

تان‌کہ کاردام سرجم نہ انت، ٹانکر بی زرّ ءَ آپ بیار انت ءُ رھبند سرا بہ بنت۔ ٹانکرانی ٹایم ٹیبل، ھرچ بازارے بھر، آپہ الکاپی ءُ ٹانکرانی راہ بایدیں نبیسگ بہ بیت ءُ مُلکہ کاردارانی دست ءَ دئگ بہ بیت۔ دیر‌یں بازاراں بایدیں گاٹی ءُ بنزین ءُ گازائیل پہ اندازہ چارگ بہ بیت۔

۶. نزوریں کھولاں چارگ بہ بنت

ھما کھولاں کہ پہ بی آپی ءِ مجبور پہ ٹانکی‌، پمپ یا آپ۔ئے گِرگ ءَ بیتگ انت، بایدیں زرے کمک دئگ بہ بنت۔ مدرسہ، درمان جاہ یا کھولانہ کہ کسانیں زھگ ھست بایدیں پیش چہ دگراں چارگ بہ بنت۔

۷. ھوٹک‌ان امن بہ بنت ءُ دگے وٹ‌ایں بدلی ئے جوڑ بہ بیت

بازارانی نزدیک‌ایں ھوٹک باید‌یں ٹٹ ءُ دیوال بہ بنت، بلے ئے ھم بس نہ انت۔ ھرچ بازارے کہ ھوٹکے مھتاج انت، ٹانکی، آپ شیرکن‌کنوک یا دگے وڈیں پئیسلہ‌اے بہ بیت تان کہ مردم ھوٹکے مھتاج مہ بنت۔

۸. انّاگتی جاورے واست ءَ پہ آپے سامان ءَ برگ بہ بیت

درُستیں آب‌شیرکن‌کنوک، بُندریں چات، ساپ ءُ پمپاژ ءِ استیشن بایدیں انّاگتی برگ ءُ گازوئیل بہ بیت‌اش۔ وھدی کہ برگ نیست، آپ نبایدیں بند بہ بیت، ھار آتک یا جنگ بیت، رو ءُ آھگے واست ءَ پروگرم بہ بیت ءُ پہ مردماں شنگ بہ بیت۔

۹. آپ ءِ گواجن ءِ پایداریں سمبالگ

آپ ءِ کمّی‌ئے پسّو گیشتر آپ کَش‌اگ چہ چاتاں نہ انت۔ دولت بایدیں گیش‌ایں آپ کَش‌اگ چہ چاتاں، آپ ءِ سور کنگ، آپ ءِ زوال کنگ کشت کشارے وھدا را سمبالیت ءُ دیم ءَ بگری۔ ھمے وھدا کشاورزاں ءُ مالداراں زری ھمایت بکنت ءُ نوک‌ایں ٹکنولجی پہ آپ دیگ ءَ بیاریت۔

۱۰. هیرمند ءِ ھک‌آپ ءِ رندگیری ءُ هامون ءِ سمبالگ

دولت بایدیں هیرمند ءِ آپ ءِ مان‌رچگ اندازگ، ۱۹۷۳ ءِ اھداں پورہ کنگ ءُ افغانستان ءَ گوں گپ ءُ شریت بکنت ءُ گپاں پہ ساپی ءَ شنگ بکنت۔ ورگی آپ ءِ رسینگ ءَ چہ ابید ھامون‌ے ھَک‌آپ ءُ مردمانی روزیگ ھم اھم‌دار انت۔

۱۱. آزادت‌ایں سرپانکی ءُ بازارے مردمانی ھواری

یک سرپانکی کمیٹی‌ئے وت کارزانوک‌اں، شھر ءُ ھلک ءِ شورا، دانشجاھی‌اں، چاگردی جھدکار، بلوچ راجمان ءُ سیستان‌ے نمایندگاں ءُ بھداشتی گل‌اں بنگیج بہ بیت۔ ائے کمیٹی بایدیں زَرّے سرا، آپ‌ے الکاپی سرا، پروجکٹ‌انی دیمروری ءَ ءُ انّاگتی وھدے بھر بُن ءَ سرپانکی بہ کنت ءُ آسر ءَ پہ مردمان شنگ بہ کنت۔

۱۲. برابری ءُ پرک ایر نه کنگ ءِ ضمانت

پاکیں ورگی آپ ءِ دست کپگ نبایدین پہ مردم ءِ نندگ ءِ جاگه، کَوم، دین، زرّ یا یک ھلک‌ے دوری چہ شھر ءَ مربوت بہ بیت۔

نیزگار ءُ دوریں ھلک باید انسانی نیاز ءُ زِبَهری ءِ سختی ءِ رِد ءَ اولا چارگ بہ بنت، نہ سیاسی زور یا پروجکٹ ءِ زری سود۔

گُڈّسریں گپ

سیستان ءُ بلوچستان ءِ مردم دگہ نوکیں واده نہ‌ لوٹنت۔ آ پاکیں آپ وت الکاپ‌ایں زور ءَ، ٹایم ٹیبل، سرپدی چہ ھالاں ءُ سرکارے کہ پسّو بہ دنت لوٹ‌انت،

پاکیں ورگی آپ یک سرھَکّ، هیراتی کمک یا دُگینی لوٹ نہ اِنت۔ آپ مردم ءِ بُندریں انسانی هک اِنت ءُ آئی ءِ پُجّاربنگ دولت ءِ زمه‌واری اِنت۔-