آذربایجان تورک فعالی میلاد بالسینی درحال آزاد ائدیلسین
خطاب: ایران اسلامی جمهوری‌سی‌نین قوه قضاییه‌سینه و مسئول قوروملارینا
۱۷ شهریور ۱۴۰۵
بیز، بو دیلکچه نی ایمضالایانلار، میلاد بالسینی‌نین ـ آذربایجان تورک ژورنالیستی و مدنی فعالی‌نین ـ توتولماسینی و اونا قارشی امنیتی دوسیه دوزلدیلمه‌سینی قیناییر و اونون درحال، هیچ بیر شرط قویمادان آزاد ائدیلمه‌سینی ایسته‌ییریک.
میلاد بالسینی سه‌شنبه گونو، ۲۷ مرداد ۱۴۰۵ تاریخین‌ده، تبریز عمومی و انقلاب دادسرایینین ۱۵-جی بازپرسی شعبه‌سینه گئتدیکدن سونرا توتولوب. اونون توتولماسی دوسیه ضابطینین ایسته‌ییله اولوب و اونا ۳۰ گونلوک موقت حبس قراری وئریلیب. او، ایندی تبریز اطلاعات اداره‌سینین توتاق یئرین‌ده ساخلانیلیر.
تبریز دادستانلیغی، عائله‌نین دؤنه-دؤنه سوروشماسینا باخمایاراق، میلاد بالسینی‌نین جسمانی و روحی دورومو، ساخلاما شرایطی و دوسیه‌نین نئجه یرده اولدوغو باره‌ده هیچ بیر بیلگی وئرمیر. عائله‌یه دئییلیب کی، بو توتولما باره‌ده اونلارا هیچ بیر بیلگی وئرمه‌یه ایجازه یوخدور. بو دا میلاد بالسینی‌نین عائله‌سینی آغیر بی‌خبری و نگرانی ایچینده ساخلاییر.
اونا قارشی ایرلی سورولن اتهاملار «نظاما قارشی تبلیغ»، «بیلگی‌لری معاند رسانه‌لره گؤندرمه» و جنگ شرایطین‌ده «ملی امنیته قارشی دشمن دولت‌لرله همکارلیق» دیر. بو عمومی و امنیتی اتهاملار، تبریز اطلاعات اداره‌سینین میلاد بالسینی‌یه قارشی دوسیه دوزلتمه‌سی سونوجوندا اورتایا آتیلیب. بو اتهاملار اونون مدنی، فرهنگی و کیملیکله باغلی فعالیت‌لرینی باسیب-سوسدورماق اوچون بیر وسیله‌یه چئوریلمه‌مه‌لیدیر.
مدنی فعالیت، آذربایجان تورک خالقی‌نین دیل و کولتور حقوقلارینی مودافعه ائتمک، بیلگی یایماق و گؤروش‌لرینی ساکین و زوراکیلیقدان اوزاق شکیلده بیلدیرمک جینایت دئییل.
آذربایجانلی مدنی فعاللارا قارشی امنیتی اتهاملاردان ایستیفاده ائدیلمه‌سی، ساکین مدنی فعالیت‌لری جینایت لشدیرمه و آذربایجاندا حق ایسته‌ین سس‌لری سوسدورماق اوچون گئنیشله‌نن ناراحات ائدیجی بیر یؤنلومون بیر پارچاسی‌دیر.
میلاد بالسینی بوندان قاباق دا امنیت قوروملارینین باسقی، چاغیریش و سورغولاری ایله اوز-اوزه قالیب.
او، ایللر قاباق مراغه دانشگاهیندا روان‌شناسی بؤلومونده کارشناسی اوخویاندا و «ائلین» اؤیرنجی نشریه‌سینین مسئول مدیرى اولاندا، اؤیرنجی فعالیت‌لرینه و بو نشریه‌نی یایماغینا گؤره نشریه‌سی باغلانمیش، اؤزو ده انضباط کمیته‌سی طرفیندن بیر موددت تحصیلدن اوزاقلاشدیریلمیشدی.
او سون ایل‌لرده آذربایجاندا رسانه و محیط زیست ساحه‌سینده فعالیتینی دوام ائتدیریب. اونون تبریز اطلاعات اداره‌سینین توتاق یئرین‌ده، عمومی نظارتدن اوزاق و عائله‌یه آچیق جواب وئریلمه‌دن ساخلانماسی، اونون امنیتی، ساغلاملیغی و قانونی حقوقلارینا رعایت اولونماسی باره‌ده جدی نگرانچیلیق یارادیب.
ایران اسلام جمهوریتینین اساسی قانونونون ۳۲-جی اصلینه گؤره، توتولان آداما اتهام قونوسو و اونون دلیل‌لری درحال و یازیلی شکیلده بیلدیریلمه‌لی و آچیقلانمالیدیر.
همچینین، کیفری دادرسی آیین قانونونون ۴۹-جو ماده‌سینه گؤره، نظارت آلتین‌دا اولان آدامین یاخین عائله اوزولری اونون دوروموندان بیلگی آلماغا حاقلی‌دیرلار و مسئول قوروملار دا اونلارا جواب وئرمه‌یه بؤرجلودورلار.
دادستانلیغین عائله‌یه هیچ بیر بیلگی وئرمه‌مسی، بو قانونی حقوقلارین آچیق شکیلده پوزولماسی‌دیر.
میلاد بالسینی‌یه قارشی ایرلی سورولن اتهاملار صلاحیتلی و مستقل بیر محکمه‌ده، عادالتی بیر یارغیلاما سوره‌جینده ثابت اولاناجاق گونə قدر، او گناهسیزلیک اصلین‌دن یارارلانمالیدیر.
موقت توتاقلیلیق، محکمه‌دن قاباق جزایا و یا بیر مدنی فعاله باسقی گؤسترمه وسیله‌سینه چئوریلمه‌مه‌لیدیر.
بیز، بو ایستک‌نامه‌نی ایمضالایانلار، ایران اسلامی جمهوریتی مسئوللاریندان ایسته‌ییریک کی:
- میلاد بالسینی‌نی درحال و هیچ بیر شرط قویمادان آزاد ائتسین‌لر؛
- تبریز اطلاعات اداره‌سینین اونا قارشی دوسیه دوزلتمه‌سینه و امنیتی اتهاملاردان ایستیفاده ائتمه‌سینه سون قويسون‌لار؛
- اونون جسمانی و روحی دورومونو و ساخلانما شرایطینی درحال و رسمی شکیلده عائله‌سینه بیلدیرسین‌لر؛
- اؤز سئچدیگی وکیله مانع سیز و گرچک چاتیمینی و عادالتی دفاع حاققینی تامین ائتسین‌لر؛
- اعتراف آلماق اوچون هر جور باسقی، تهدید، سؤیوش، آلچالتما، شکنجه و زورلامانین قاباغینی آلسین‌لار؛
- آذربایجان تورک فعاللارینین مدنی، فرهنگی، دیل و کیملیک فعالیت‌لرینی جنایت لشدیرمه‌یه سون قويسون‌لار.
بیز همین‌جه بیرلشمیش میلت‌لرین ایراندا انسان حقوقلاری اوزره اؤزل گزارشچی‌سیندن، بیرلشمیش میلت‌لرین اؤزباشینا حبس‌لر اوزره ایشچی قروپوندان و بوتون انسان حقوقلاری قوروملاریندان دا ایسته‌ییریک کی، میلاد بالسینی‌نین دورومونو درحال ایزله‌سین‌لر، اونون آزاد ائدیلمه‌سی و آذربایجان تورک فعاللارینا قارشی امنیتی دوسیه دوزلدیلمه‌سینه سون قویماغ اوچون گره‌کلی آددیملاری آتسین‌لار.
مدنی فعالیت جنایت دئییل.
دیلینی، کیملیگینی و مدنی حقوقلارینی مودافعه ائتمک جنایت دئییل.
میلاد بالسینی‌نی درحال و هیچ بیر شرط قویمادان آزاد ائدین!
-
-
سون حادیثه‌لر
-
امضالارین یئری
اوستان ایمضالارین ساییسی البرز ایالتی 1 اردبیل ایالتی 12 بوشهر ایالتی 0 چهارمحال و بختیاری ایالتی 0 دوغو آذربایجان ایالتی 17 فارس ایالتی 1 گیلان ایالتی 2 گولوستان ایالتی 0 همدان ایالتی 0 هرمزگان ایالتی 0 ایلام ایالتی 0 اصفهان ایالتی 0 کیرمان ایالتی 0 کیرمانشاه ایالتی 0 خوزیستان ایالتی 0 کهگیلویه و بویر احمد ایالتی 0 کوردیستان ایالتی 0 لوریستان ایالتی 0 مرکزی ایالتی 1 مازندران ایالتی 0 قوزئی خوراسان ایالتی 0 قزوین ایالتی 0 قوم ایالتی 0 رضوی خوراسان ایالتی 0 سیمنان ایالتی 0 سیستان و بلوچستان ایالتی 0 خوراسان ایالتی 0 تهران ایالتی 5 باتی آذربایجان ایالتی 12 یزد ایالتی 0 زنگان ایالتی 3 بو دیلیکچه ایندییه‌جن 157 ایمضا توپلاییب‌دیر. 87% ایران‌دان، 13% حدودوندا ایسه خاریجدن گلمیشدیر. ایران خریطه‌سینده ایمضالارین ترکیبی حاققیندا داها آرتیق بیلگی الده ائتمک اوچون بورا کیلیکلهیین. -
سون ایمضالار
-
تلگرام واسطه‌سی ایله ایمضالاماق -
تلگرام واسطه‌سی ایله ایمضالاماق
-
تلگرام واسطه‌سی ایله ایمضالاماق
-
The criminalization of the civil, cultural, linguistic, and identity-based activities of Azerbaijani Turk activists must end.
-
تلگرام واسطه‌سی ایله ایمضالاماق
-
-
بو دیلکچه‌نی یازدی
